جريدة أماليا
قصيدة للشاعر مصطفى اسماعيل بعنوان عيل يا رب
النص ده هتلاقي فيه منك
وتلاقي فيه مني
كل اللي كان واجعك
واقف بيقتلني
مُر الحياه فيا
مُر السنين سني
الأوله سالب
مغلوب وقال غالب
طاف الحياه في مطاف
مُر الحياه هيّ
اديتها نني العين
رفضت تطمني
يا قلة القيمه
يا نفسي يا غريمه
يا هزيمه في هزيمه
تدينا كام مهزوم !
عندِك أنا شاعر
عندك أنا ثوري
عندك أنا عربيد
وانا برضوا لسه بعيد
وانا برضوا بلا قيمه
هي الهزيمه
هي الهزيمه
هزيمه بكل معانيها
بكل أنواعها
وهي حبيبتي بحسنها
وحزنها ودلعها
القسوة بيعه ..فقلبي من مده
العمر تجميعه ..القطر مش هدا
يا دنيا يا وضيعه ..ما تبطلي حده
شارع يا دنيا والجميع ماشي
ڤتارين عنيها تطل عالماشي
واشاره حمره تقولي متعديش
وعيون صبيه قالتلي رجعالك
اِبقا النهارده وبكره بقيالك
الفرح جالي وانت عقبالك
وسابتني عادي ما كل شئ بيسيب
وده نوع هزيمه سميناها نصيب
قلبي اللي سابق خطوتين رجلك
قابلي مشاعري بضحكتين وابقا
اضحك فعينك كل ما هقابلك
خالصين موده كإننا خلصنا
ملايين معانا وبرضوا فلسنا
انا والقصيده من يونسنا!
امته الحياه وقفت على الواحد
كان قلب طيب امته بقا جاحد
الناس دي مش مالناس
الناس بتتجاحد
وانا لسه ابيض وانتي ايدك دم
سامحيني عيل فوق كتافه الهم
سامحيني عيل بكره متلاقيهوش
ضحك الوشوش غرّه
ضحكك جميل جره
كافي الجميع شره
والشر مش كافي
شيلتك على كتافي
شيلتك على كتافي
هي الهزيمه
هزيمه بكل معانيها
بكل أنواعها
عيل يارب أرجوك لتمنعها
وتكفي روحي الخلق مؤذيه
قتلوا الحاجات الطيبه فيه
عيل يارب
مكسورله كتف وعين
عاصي ومن الملاعين
انت الجميل واهو ظنه فيك أجمل
كان حلمه بس ان الطريق يكمل
أو حتى يوصل بدري لو ساعه
فارق جماعه
فارقوا الجماعه ويارب ترضا
صورني صورة قوي
أو حد مش منطوي
أو حد بيحبك
أو حد بتحبه
وبنيت جدار قلبه
بسأل ساعات إنما
صوتي هيوصل فين
اذا كنت فوق في السما
وانا ابن طينه وأرض
دفنوني جوه الأرض
قتلوني بلا ديه
مبقتش اخاف على نفسي لما اتدفن
خايف عاللي بعديا
نفس خوفي عليا
نفس خوفِك عليا
نفس خوفنا ماالسنين اللي جايه
نفس الحياه هي
نفس الأذيه اما اتأذيت
ايدي لفوق بدعي
من امته كنت شكيت
بكيت بحرقه بكيت
كل الحاجات جايه عكس ما اتمنيت
كل الحاجات بتبعد
وتبعدني
لو مش هتوفي بلاها توعدني
لو مش حبيبك انا ياريت تسيبتي
خلي ايديه مالبدايه
سيب النهايه لحد غيري
جايز تكون أحسن
إحزن عليه بس متطولش في الإحزان
إسأل عليه وقول
آخر بني الإنسان
غسلني بالإحضان مش الميه
وعدك عليه الحر هيوفيه
شاعر أنا لما السما تلهمه
والبحر بيهديه
يا موج ياعالي الصخر بيفتتك
السكه دي مش سكتك
مجازيب وقالوا الشعر للدراويش
أكاذيب تقول الشعر ده هيعيش
اكاذيب تقول ان الحقيقه حقيه
إيه الحقيقه والعدم
إيه اللي أصعب مالشعور بالندم
وبقلة القيمه
إيه اللي أصعب مالهزيمه
غير الهزيمه !
تعليقات
إرسال تعليق