لما نتجوز هتقلعي الخمار

=نعم

ايي شكلك وحش اووي بيه ومش هعرف امشي معاكي كده

=مش هقلعه واللي عندك اعمله وادي دبلتك اهي

(قبل مايمشي قالي جمله وجعتني اوووي) 

مانت كده كده وحشه اصلا بيه أو من غيره مش فارقه كتير واحسن اننا نبعد معرفه شؤم

(انا عارفه ان ربنا مدانيش اي حاجه من معالم جمال الشكل بس عوضني ف جمال روحي، محدش عرفني محبنيش وبعدين انا ذنبي اي دي خلقة ربنا، ازاي يجيله قلب يقولي كده، وهي ايه اللي ازاي إذا كان عايزني اقلع الخمار، ازاي ده كان هيبقي جوزي يارب اهديه وعوضني، محدش ف البيت رضي يتكلم قدامي ف الموضوع فاكريني مقهوره بقي وكده ممكن اكون زعلت شويه بس مش اووي انا راضيه بتدابير ربنا والله، صح انا رُبَي 22 سنه ف اخر سنه ف فنون جميله بس، مفروض أن بكره عندي محاضرات وفي دكاتره اتغيروا ف هنام عشان الحق اروح من بدري، نمت وصحيت صليت وفطرت لبست فستان وخماري ونزلت وصلت الجامعه وجايه ادخل المحاضره لقيت الباب مقفول وذلك يعني أن الدكتور دخل خبطت ومسمعتش رد ف دخلت الدكتور بصلي وانا كملت مشيي ووقفني

_انت ياانسه

=ايوه حضرتك

_انت مين سمحلك بالدخول

=والله حضرتك مقولتليش متخشيش يبقي مخشش ليه

_انت شايفه كده يعني

=اه

_طيب بره

(مردتش عليه وخرجت، هتجنن يعني ع محاضراته تولع المحاضره، كنت هستني بس قررت امشي واروح ع البيت، روحت وماما سألتني ف حكيت لها اللي حصل وعادي يعني كملت يومي ونمت وصحيت تاني يوم وصليت ولبست وروحت الجامعه بدري ودخلت قبل الدكتور عرفت مؤخرا أن اسمه زين ازاي مسمينه زين ده، ده زين، اومال الزفت يبقى ايه، دخل وشرح، الصراحه شرحه حلو وأول مره افهم كل المحاضره، خلصت واحنا خارجين ولد عاكسني بصيتله بقرف ومشيت فقالي) 

اومال لو كنتي حلوه كنتي عملتي ايه فينا 

(مرديتش عليه وكملت مشي بس كلامه بجد وجعني، ف لما اتجاهلته جرى ورايا و مسك ايدي مقدرتش امسك نفسي وضربته بالقلم جيه العميد واخدنا ع مكتبه وعرفت انه ابنه، العميد قعد يزعقلي انا، فأنا قلت) 

=مش من حق حد يمسك أيدي، ومش من حقه يقول عليا وحشه ولا حلوه رأيه ف الزباله

(خلصت كلامى ومشيت المفروض اعمل اي عشان وحشه ادفن نفسي يعني هو انا اللي اختارت شكلي، روحت وعرفت أن في عريس متقدملي وكالعاده رفضت، انا مش حمل وجع جديد، مش حمل تعب وحزن، انا قلبي مجروح مش عايزه اكسره خالص، حكاية أن حد يدخل حياتك وتتعود عليه وفجأه يختفي بسهوله متعبه اووي، حكايه أن حد بتحبه  يضلك أو يمشيك ف طريق بعيد عن ربنا صعبه اووي، حكايه أن دموعك تنزل بسبب أقرب الناس ليك بتوجع لو انتوا اللي بتزعلوني اومال مين اللي هيفرحني، بابا صمم ع العريس ده عشان كلام الناس وازاي افسخ خطوبتي هو انا اجرمت يعني، المهم قمت ولبست اي حاجه ع بعض ندهو عليا وخرجت وسابونا لوحدنا قبل مايتكلم اتكلمت انا ومن غير ماابصله ولا اعرف شكله) 

=قبل أي حاجة عايزاك تعرف اني مغصوبه ع القعاد معاك، انا مش حلوه ولا شكلا ولا روحا، ومش هقلع الخمار بالعكس انا ممكن اتنقب كمان، ومش ناويه احب عشان ببساطه مش ناويه انكسر. 

_امم خلصتي 

(حسيت اني سمعت الصوت ده قبل كده، رفعت وشي لقيته هو زين، قصدي الزفت تنحت شويه وبعدين فوقت ع صوته) 

_عارف اني قمر احم صح، انت مش وحشه ع فكره انت جميله جدا بجد وانا شايفك قمر مش عايز أطول ف مدحك عشان مينفعش وكده، وع فكره انا اللي هجبلك النقاب محبش حد يشوف حاجه تخصني غيري، واه انت دبش. 

=مش موافقه برضه 

_مش بمزاجكك هو خشي نادي لابوكي 

=اسمها باباكي

_لا باباكي دي بتاعت العيال التوتو وانا مش توتو 

(ضحكت ومشيت انادي بابا وهو كمان مشي، صليت استخاره وحاسه براحه، بس انا خايفه اووي مش عايزه اتوجع تاني المرادي هموت لو اتسبت، ف قررت انا وقلبي اننا مش هنتعلق بيه ف فترة الخطوبه ونتعلق بعد كتب الكتاب اهو هيكون ابننا ومننا وعلينا، وكالعاده طلعت انا وقلبي مهزقين واتعلقنا عادي جدا، كنت بسرح كتير فيه وبفوق لما يسألني كنت بجاوب لاني 

ببقى محضره اللي هيشرحوا، الخطوبه اتعملت ويومها كان نفس يوم كتب كتابي عشان نعرف نخرج بقي وكده بس انا  كنت عايزاها ع الضيق بس هو رفض وعملناها ف قاعه، اليوم كان جميل اووي والله، لحد مافجأة ظهرت حاجه غيرت كل ده ظهر خطيبي القديم وقف مع زين وقاله) 

مبروك فرحان فيك بس نصيحه، يبني أجري دي مش حلوه اصلا 

(كلامه قتلني اووي مقدرتش اتكلم وجريت زين جيه ورايا وركبني العربيه ووقفنا ع الكورنيش بدأت اعيط واقوله) 

=ذنبي ايه اني وحشه، ربنا هو اللي خلقني كده، طلاما انا وحشه خطبني من البدايه ليه، علقني بيه ليه، كسرني ليه، انا معنديش ثقه ف نفسي بسبب كلامه، انا بموت 100‪ مره لما بسأل نفسى هو انا وحشه، السؤال نفسه بيوجعني مابالك بالجواب، انا فعلا وحشه بس دي خلقت ربنا اموت نفسي يعني عشان شكلي، عشان وحشه يبقى مش من حقي افرح وأخرج واحب و اتحب، هو انا مش بنت زي باقي البنات، ليه بيحكموا علينا،  ليه بيكسروا بخاطرنا وبيوجعونا، ليه يااارب خلقتني وحشه

(وقفني هنا وقالي) 

_هشش مفيش حاجه اسمها ليه، انت مش وحشه والله ماوحشه، هو اللي عينه وحشه وقلبه مليان حقد وسواد، انت والله قمر ومفيش بنت وحشه كل البنات حلوه، هو ع فكره مش احلي واحد يعني الحلو في الاحلي منه فاهمه وبعدين كفايه انك قمر ف عيني قمرين دول ولا عينين تيررارا عشان مش حافظ الاغنيه. 

(ضحكت واتأكدت أن ربنا عوضني بيه وأنه هديه من ربنا) 

"تألمت كثيرا من قبل مجيئك ف عوضني الله بك وحينها نسيت حزني وقلت أن حزني فداء لوجودك بقربي"

حاجه اخيره

هو انا وحشة؟؟ 

*كتير اوي او معظمنا تقريبا بيسأل السؤال ده لنفسه وبيبقي نتيجته انك بتخشي ف كمية كآبة وعياط وخنقه رهيبة، وده كله بسبب سؤال غلط، مفروض سؤالك يكون هو انا جميلة هرد انا عليكي وهقولك اه انت جميلة واللهم بارك قمر كمان بس انت مش واخده بالك من مميزاتك، لما بتقفي قدام المرايه اول حاجه بتاخدي بالك منها الحبايه اللي طالعه ف جبينك، وسمارك من الشمس، طب ليه مبتاخديش بالك من ضحكتك اللي تاخد القلب حقيقي، طب ليه مش بتاخدي بالك من خدودك، ولا من الغمزات البسيطه القمر دي، ولا سمارك اللي هو اصلا الجمال بعينه، ولا ايه ولا ايه هتلاقي كتير اوي حاجات حلوه فيكي، انت اللي بتحلي الحاجه مش الحاجه هي اللي بتحليكي، متصدقيش اي حد بيقولك انك وحشه، انت مش وحشه هو اللي عينه وحشه وقلبه اسود وقوليله شوف عيوبك الاول وبعدين تعالي عيبني وحاجه اخيره انت قمر باخلاقك قبل شكلك فاللهم جمل خُلقي كما جملت خَلقي، بحبكم ف الله ⁦♥️⁩،