جريدة أماليا
حوار صحفي
مع
الشاعر سراج المالكي
بقلم اسماء جاب الله
اليوم نلتقي بأحد الشعراء الصاعدين، صاحب القلم المؤثر على السوشيال ميديا، من اعتنق المذهب الأصعب ليتحول من المتخاذل الأكبر لشخص ينصح كل متخاذل كي يصبح أفضل، معنا الشاعر الصغير سنًا والكبير مقامًا سراج المالكي، برحب بحضرتك وفي البداية أحب نتعرف بيك
-اسمي سراج الدين عصام معروف وسط صحابي بأسم سراج المالكي
عندي ١٩ سنة و هكمل العشرين في شهر ١١ الي جي
انا مواليد محافظة البحيرة في مركز ابو المطامير لكن دلوقتي عايش في غرب النوبارية بقالي ٨ سنين تقريباً
بدايتي مع الشعر كانت صدفه رغم أن والدي شاعر
بس كنت في الثانوية وسمعت قصيدة للشاعر عمرو حسن وبدأت ادور اكتر وأقرأ اكتر لحد ما كتبت شعر
"ده الفن متأصل في العيلة بقا، بدأت تنشر أعمالك ع السوشيال ميديا واللي واحدة واحدة بتكبر وشهرتك فيها بتزيد
ممكن تكلمنا عن الميديا في مشوار سراج المالكي
-اول ما بدأت في سنة ٢٠١٩ عملت اكونت اسمه بيقولو شاعر لان كان معظم صحابي مش متقبلين الي بينزل على الاكونت فا قفلت الاكونت الشخصي وكملت بالاكونت ده واحده واحده اتطورت واتعرفت وسط الناس الي بتكتب لحد النهاردة على نفس الوضع والسوشيال سهلت عليا كتير
"وبعدها حصل طفرة عزيزي المتخاذل، احكيلنا عن عزيزي المتخاذل والمتخاذل الأكبر سراج المالكي
-عزيزي المتخاذل ده فكرة جت صدفه وانا قاعد في البلكونه بشرب شاي بالنعناع
كنت مهتم بكتب تطوير الذات فا سجلت حلقة بتتكلم عن أن حياة الشخص عبارة عن كوباية شاي وان مهاراته هي السكر وان مجهودة هو المعلقة ولازم يقلب علشان يحس أن حياته بدأت تتغير، الناس كان عاجبها الطريقة فا كملت بقا،
المتخاذل الاكبر سراج هو الي كان متخاذل فعلا وقرر يغير حياته يعني كنت بنام متأخر بقيت بنام الساعه ١٠ وبقوم اصلي الفجر بقيت بصلي وبحاول ابقا احسن يعني فا عزيزي المتخاذل بيحكي قصص للأشخاص الي نجحت بعد معاناه
"اي الموضوعات اللي اتكلمت فيها ف عزيزي المتخاذل
-شعارنا كل حلقة قصة واجرحك احسن ما اريحك
حوار صحفي مع الشاعر سراج المالكي بقلم : أسماء جاب الله
" ليه اشتغلت عزيزي المتخاذل ومشتغلش الشعر ف فيديوهاتك
-الناس حبيتها اكتر من الشعر بفضل شغال على الفديو بكتب واسجل واعمل مونتاچ ومحدش بيهتم اوي على عكس المتخاذل، ويذكر برضو اني بكتب الحلقات واصورها لنفسي واعملها مونتاچ يعني بصنع الفديو كله لوحدي
"يعني طموحك دلوقتي تكمل الشعر ولا تكمل عزيزي المتخاذل
-واي المانع اني اكمل الاتنين جنب الراب انا بحبهم كلهم+ الكورة لاني حارس في نادي الناصرية
"سراج يبحث عن الشهرة لا أكثر
صح ولا غلط
-الشهرة لا اكثر كنت رقصت على التيك توك
اه ببحث عن الشهرة بس بمحتوى
"دي الفكرة بقا
انك تعمل اللي تحبه مش اللي يحبه الناس
-انا بعمل الي بحبه والي الناس بتحبني وانا بعمله بحب، موضوع معقد بس صحابي كان فيهم ناس عايزين حلقات كل يوم
"أهم قصيدة كتبتها اي
-مفيش اهم بس الناس بتحب تسمع مني سفينة نوح
و يا ليلة العيد و ادمنتها
انا بقا بحب اولى دنيا
الي هي
" اولي دنيا "
علموني في أولي دنيا
إني هكبر وأبقى أهدى
وإني اروح بستان جيرانا
إيدي ما تجرحش وردة
عيني ما تشوفش الحاجات !
علموني ف أولي دنيا
ان كل صديق معايا
آخره خانة ذكريات
علموني برضو اني
لما يكبر فيها سني
لما هبقى حد فاهم
إن حبي فى أولي دنيا
شيء خيالي وحب واهم
قام قايلي حد منهم
:إني زينهم! واني حي !
وإن بكره الجاي ضي
واني جوا النار هبيت
بس دي معلومة ساذجة
ما اتولدت في أولي دنيا
رغم ذلك كنت ميت
علموني ف أولي دنيا
إني انام وحسابي خالص
وإني أنشف وإني أجمد
وإن حلمي طوبة طوبة ابقى راصص
علموني باني عربي
واني مصري وإني حي
وان ايدي قادرة ترسم
مصر حلوه وبكرا جي
وان كل حاجه وارد
تختلف. فيها العقول
علموني مصر خاضرة
وقمح مزروع ف الحقول
علموني حجات كتير
عقلي كان فكرها ثابته. !
بس نسيو يعلموني
إني لسة ف اولى دنيا
وانها مش دنيا واحدة.
من اول دنيا
لتالت دنيا
كام سنة؟
أنا روحي طلعت كام سما
ولا أنا
مدفون هنا
تحت طين الأرض
هو احنا فعلا زي بعض
ولا احنا كام
٢٠ سنة
لكن كلام
الدنيا دي بتاعت علام!
ولا بتاعت قوم بقا
تنزل كفوفك م الشقا
متشققه ٢٠ سنة
وأنا ماشي فيها بقاعدة ثابتة
٢٠ سنة وأفضل في تالتة
وشايل في المشاكل ملحقين
انا روحت فين؟
تايه عشان عارف طريقي
إلي أنا انحرفت عنه
بهرب للحزن عشان اصلًا
معرفتش أهرب مره منه
بهرب وبعود
وبعود هارب
سكران وأنا اصلًا مش شارب
بشوف الدنيا
علي مراحل
وبشوف الناس لابسه عقارب
نص تجارب
نص ولا يزيد
تالت دنيا ولسا فيها وحيد
مليش صاحب في آخر دسك
ينكشني وانكش فيه
ومليش عدوا مِن البشر
علشان أفكر أي مره ائذيه
ولا عندي حلم أقوم عشان ابنيه
وعندي قلب ويجي ١٠٠ حته
لميه وتعالي خديه
وخديني جنبه عشان خلاص خلصت
أنا كنت عضمه وبعدها اتمصمصت
وبقيت حزين
والحزن باين خام
هتقولي مالك
أنا اقول تمام
٢٠ سنة وفي تالت دنيا
طب رابع دنيا أنا هبقا كام؟
"جميل، بتقرأ لمين م الشعراء
-الفترة دي مش لحد بس كنت بحب اقرأ لمحمد ابراهيم جدا هو وحسام ابراهيم
"حسام ابراهيم ممتاز وشعره فيه عمق مختلف
-ده الي بحاول اشتغل عليه اني اكون مختلف، واخدت مدرسة قليل لما حد بيكتب فيها وهي الشعر الي يوصل معاني فيها تفاؤل وتنتمي لعلم النفس الاسلامي
" الشعر غاية ولا وسيلة للنجاح؟
هو الغاية وهو الوسيلة، يعني غايتي اني ابقا شاعر كبير
والوسيله اني اكتب شعر، اقصد يعني أن الغاية هي الهدف
والوسيلة الطريقة الي هوصل بيها للهدف
وانا هدفي ووسيلتي الشعر
" تمام بس ازاي بتكتب حاليًا من غير ما تقرأ؟
-لا قريت كتير في علم النفس الاسلامي وغيره بس مشكلتي اني باخد المعنى و بنسى الجوهر أو شكل النص يعني انا اصلا بدرس علم نفس في الكلية والحمد لله نسيت مان بيتكلم عن اي مع اني بحبه، فكتبت حاجات مثلا زي منهج الركعتين
او يا ربنا،
"لكل منا انتكاسة، حصل معاك موقف قلت ساعتها مش هكتب؟
-مواقف بس انا قلبي ابيض بسامح وبنسى الشخص الي عطلني بطريقة اياً كانت
لو تقصدي مواقف ممكن في فترة في حياتي كنت بعمل حجات كتير اكتب شعر العب كورة وغيرها كتير
كنت شايف نفسي مشتت أو صاحب بالين كداب الخ
بس لقيت كتاب اسمه متعددي المواهب بقيت وقتها عارف اني شخص مميز عن صحابي ومجتمعي بعمل كذا حاجه وعندي وقت فراغ
"اي رأيك في الوسط الأدبي حاليًا ومين أهم كتاب جيلك؟
-لو تقصدي الوسط الادبي الي هو الاندر ريتدد الي احنا فيه فا ده فيه مشاكل كتير زي السرقة والاستغلال من منظمين الحفلات لطريقة تفكير الكتاب الي بيستغلو مواهبهم في الارتباط بعدد أكبر من البنات والوسط لم
"أهم القصائد أو الدواوين اللي قرأتها وأثرت فيك وفرقت معاك كشاعر؟
-وحشتيني لأنها اول قصيدة اسمعها ومكنتش اعرف اسم الشاعر اصلا وقتها ودي سبب اني اكتب شعر
ديوان سجن اوس اربعه وديوان فلوماستر ابيض خلوني افكر بطريقة مختلفه شوية
"إزاي بتطور من نفسك ف الكتابة وبتنصح الكتاب اللي عاوزين يتطوروا ب اي
-لما بحس اني محتاج اتطور بقرأ كتير مش شرط شعر ممكن ادخل مجال جديد في نوع الكتب منها ازود معلوماتي وابص لمكان محدش بصله قبل كدة ولو على النصيحه فا ياريت تشوف الي ناقصك ومتحسش انك بقيت كامل وانك كويس جدا لان ده هيخليك توقف تطوير وخلي هدفك كبير
"لو رجع بيك الزمن تختار مين يكون معلمك في الشعر
-عمرو حسن علشان بحبه وبحب طريقته
"نصيحة للكتاب عشان يتطوروا وينجحوا
-عليك أن تعمل في صمت وان تجعل نجاحك يصنع الضجيج مش لازم تتكلم كتير بس اشتغل كتير وما تشتغلش من غير تخطيط أو تخطط من غير شغل لازم تجمع الاتنين علشان تنجح
"لو ليك خطة مستقبلية في الشعر سواء حفلة أو ديوان سيب خبر عنه
"أن شاء الله في حفله قريب في اسكندرية بشكر صاحبي واخويا مصطفى اسماعيل كان سبب بعد ربنا اني اكون موجود فيها
وان شاء الله في مشروع لحفله في مكان كبير مع عمر هلال يارب تكمل على خير
بشكرك على وجودك معانا متمنيين دوام النجاح والتوفيق.
تعليقات
إرسال تعليق