(وحدك حزين )
سالك طريق مش سكتك
هتروح لمين !
ومين يآنس وحدتك
مين اللي شال عنك
سمع منك ..وجع جواك
مين اللي قال هفضل
ولحد هذا الوقت لسه معاك
وجعاك حكاوي كتير
مليت من الرحلة
واللف والمشاوير
وناس تروح متجيش
والصبر عالتأخير
مشيوا وسابو الأثر
كان قلبي يومها انكسر
علشان بقى مفارق
سرق الخليج عمرنا
حتى الخليج سارق
آلمك في كل مكان
مش بس يوجع فيك
أناروحت أموت علشان
حبة مظاهر Fake
عنوان لهذا النص
"الوحدة رهن إيديك "
والغربة دي لأجلك
تحتاجها !..تحتاجلك
الليل صحيح شاغلك
بس النهار يأويك
شرخ الحيطان هين
شرخ القلوب أوسع
ألم البيوت ولا شئ
ألم البشر يلسع
إن نمت بره البيت
حلمك كابوس يفزع
مش بس هيصحيك وتشهدله
مين اللي بيجادلوا
ويقولوا خير..سافر
قولوا لكل الناس
إن المطار كافر
وان الوطن أولى
وانك سافرت عشان
فشلت في محاولة
وانك وحيد ميت
والحزن فيك بيت
وحدك حزين علطول
لما البعاد بيطول
متقولش إنه نصيب
في الغربة فيه ملايين
شبعت من التغريب
احلامنا في الدواليب ..مقفولة مطوية
بلدنا أكرملنا من ألف سعودية
سافر عشان ولابد
يقدر يجيب المهر
يقدر يكون الضهر
يعرف يكون شاري ومش بياع
سافر فقلبه الأمل
راجع فقلبه ضياع
ساكت ومتألم
كان عمره ماتكلم
ولا باح بسره لحد
يضحك في عز الزعل
كاره لكلمة بجد
كان عمره يوم ما انفعل
آدي الخليج إفتعل
شخص غير هو
أصبح يخاف الناس
جواني من جوة
راجع عشان خايف
إنه يموت لاجئ
كان صاحبه متفاجئ
بشعره اللي مش موجود
نظره اللي كان على وشك
إنه يكون مفقود
وضهره اللي انحنى
ألم الفراق لو سنه
صعب في معاملته
كل اللي حب السفر
الوحدة جت قتلته
فتحوله أهله الباب
حضنوا الفلوس وسابوه
لموا تمن عزلته
شيبت شعرك ليه
كلمة وقالوها هزار
دارت حياته مدار
أضيق كتير مالنفس
كان يعني ياللأسف
على كل لليل شافه
على كل يوم خافه
على كل خير جالهم
من لحم فكتافه
يأسفله هذا الزمن
على غربته بره
على غربته المُرة
على نفسه مضطرة
على إن عمره ماعاش
فحياته يوم ظافر
لو دوقت يوم الهم
دوقه ولا تسافر ....
_الوحدة رهن إيديك
بقلم/مصطفى اسماعيل
كيان أماليا
 سالك طريق مش سكتك هتروح لمين ! ومين يآنس وحدتك مين اللي شال عنك سمع منك ..وجع جواك مين اللي قال ه…){kind=link}
تعليقات
إرسال تعليق